ಕೂದಲು ಉದುರುವ ಸಮಸ್ಯೆ ಹೆಚ್ಚಿದೆಯೇ? ಪೋಷಕಾಂಶಗಳ ಕೊರತೆಯೇ ಕಾರಣ.

ಕೂದಲು ಉದುರುವ ಸಮಸ್ಯೆ ಹೆಚ್ಚಿದೆಯೇ? ಪೋಷಕಾಂಶಗಳ ಕೊರತೆಯೇ ಕಾರಣ

ಇಂದಿನ ವೇಗದ ಜೀವನ ಶೈಲಿ, ಅಸಮತೋಲನ ಆಹಾರ ಪದ್ಧತಿ ಮತ್ತು ಒತ್ತಡದಿಂದಾಗಿ ಕೂದಲು ಉದುರುವ ಸಮಸ್ಯೆ ಸಾಮಾನ್ಯವಾಗಿ ಕಾಣಿಸುತ್ತಿದೆ. ದಿನಕ್ಕೆ 50 ರಿಂದ 100 ಕೂದಲು ಉದುರಿಸುವುದು ಸಹಜ ಎಂದು ತಜ್ಞರು ಹೇಳುತ್ತಾರೆ. ಆದರೆ ಅದಕ್ಕಿಂತ ಹೆಚ್ಚು ಪ್ರಮಾಣದಲ್ಲಿ ಕೂದಲು ಉದುರಲು ಪ್ರಾರಂಭಿಸಿದರೆ ಅದು ಪೋಷಕಾಂಶಗಳ ಕೊರತೆಯ ಲಕ್ಷಣವಾಗಿರಬಹುದು ಎಂದು ವೈದ್ಯರು ಎಚ್ಚರಿಸುತ್ತಿದ್ದಾರೆ.

ಕೂದಲಿನ ಬೆಳವಣಿಗೆಗೆ ಕೇವಲ ಹೊರಗೆ ಹಚ್ಚುವ ಎಣ್ಣೆ, ಶಾಂಪೂ ಅಥವಾ ಟಾನಿಕ್‌ಗಳು ಸಾಕಾಗುವುದಿಲ್ಲ. ದೇಹಕ್ಕೆ ಒಳಗೆ ಹೋಗುವ ಆಹಾರ ಹಾಗೂ ಅವುಗಳಲ್ಲಿ ದೊರೆಯುವ ಪೋಷಕಾಂಶಗಳೂ ಅಷ್ಟೇ ಮುಖ್ಯ. ಕೂದಲು ಬೇರೂರಲು ಹಾಗೂ ಬೆಳೆಯಲು ಅಗತ್ಯ ಜೀವಸತ್ವಗಳು ಮತ್ತು ಖನಿಜಗಳು ಸರಿಯಾದ ಪ್ರಮಾಣದಲ್ಲಿ ದೊರೆತಿಲ್ಲದಿದ್ದರೆ ಕೂದಲು ದುರ್ಬಲವಾಗಿ ಉದುರುವ ಸಾಧ್ಯತೆ ಹೆಚ್ಚುತ್ತದೆ.

1 ವಿಟಮಿನ್ A: ತಲೆಚರ್ಮದ ಆರೋಗ್ಯ ಕಾಪಾಡಿ, ನೈಸರ್ಗಿಕ ತೈಲ ಉತ್ಪಾದನೆಗೆ ಸಹಾಯಮಾಡುತ್ತದೆ. ಇದರ ಕೊರತೆಯಿಂದ ಕೂದಲು ಒಣಗುವುದು, ಮುರಿದು ಬೀಳುವುದು ಸಾಮಾನ್ಯ. ಗಾಜರು, ಸಿಹಿಗಣಸು, ಹಸಿರು ಎಲೆ ತರಕಾರಿಗಳು ವಿಟಮಿನ್ Aಯ ಉತ್ತಮ ಮೂಲ.

2 ವಿಟಮಿನ್ B-ಕಾಂಪ್ಲೆಕ್ಸ್ (ಬಯೋಟಿನ್ ಮುಖ್ಯವಾಗಿ): ಬಯೋಟಿನ್ ಕೊರತೆ ಕೂದಲು ಉದುರುವ ಪ್ರಮುಖ ಕಾರಣಗಳಲ್ಲಿ ಒಂದಾಗಿದೆ. ಮೊಟ್ಟೆ, ಕಡಲೆಕಾಯಿ, ಬಾಳೆಹಣ್ಣು, ಧಾನ್ಯಗಳು ಇದರ ಮೂಲ ಆಹಾರ.

3 ವಿಟಮಿನ್ C: ಕೊಲಾಜನ್ ಉತ್ಪಾದನೆಗೆ ಸಹಾಯಮಾಡಿ ಕೂದಲಿನ ಬಲವರ್ಧನೆಗೆ ನೆರವಾಗುತ್ತದೆ. ಇದರೊಂದಿಗೆ ಐರನ್ ಶೋಷಣೆಯಲ್ಲೂ ಪ್ರಮುಖ ಪಾತ್ರ ವಹಿಸುತ್ತದೆ. ಕಿತ್ತಳೆ, ನಿಂಬೆ, ಸೀಬೆ, ಸ್ಟ್ರಾಬೆರಿ ಹಣ್ಣುಗಳು ವಿಟಮಿನ್ Cಯಲ್ಲಿ ಸಮೃದ್ಧ.

4 ವಿಟಮಿನ್ D: ತಲೆಚರ್ಮದಲ್ಲಿ ಹೊಸ ಕೂದಲು ಬೇರುಗಳನ್ನು ಸಕ್ರಿಯಗೊಳಿಸಲು ಸಹಕಾರಿ. ಇದರ ಕೊರತೆಯಿಂದ ಕೂದಲು ಉದುರಬಹುದು. ಬೆಳಗಿನ ಸೂರ್ಯನ ಬೆಳಕು, ಹಾಲು, ಮೊಟ್ಟೆ, ಮೀನುಗಳು ವಿಟಮಿನ್ Dಯ ಉತ್ತಮ ಮೂಲ.

5 ವಿಟಮಿನ್ E: ತಲೆಚರ್ಮದಲ್ಲಿ ರಕ್ತಪ್ರಸರಣ ಹೆಚ್ಚಿಸಿ ಕೂದಲಿಗೆ ಪೋಷಣೆ ನೀಡುತ್ತದೆ. ಬಾದಾಮಿ, ಅಕ್ಕರೇಕಾಯಿ, ಸೂರ್ಯಕಾಂತಿ ಬೀಜಗಳಲ್ಲಿ ದೊರೆಯುತ್ತದೆ.

6 ಐರನ್: ದೇಹದಲ್ಲಿ ರಕ್ತದ ಮೂಲಕ ಆಮ್ಲಜನಕ ಸರಿಯಾಗಿ ಸಾಗಲು ಸಹಾಯಮಾಡುತ್ತದೆ. ಇದರ ಕೊರತೆಯಿಂದ ಕೂದಲು ಉದುರುವುದಲ್ಲದೆ ದೇಹ ದುರ್ಬಲವಾಗುತ್ತದೆ. ಮೆಂತೆ, ಹುರಳಿಕಾಳು, ಮಾಂಸ, ಪಲಾಕು ಉತ್ತಮ ಮೂಲ.

7 ಜಿಂಕ್: ಕೂದಲು ಬೇರುಗಳ ಮರುಸ್ಥಾಪನೆಗೆ ಸಹಕಾರಿಯಾಗುವ ಪ್ರಮುಖ ಖನಿಜ. ಕುಂಬಳಕಾಯಿ ಬೀಜ, ಕಡಲೆಕಾಯಿ, ಹಾಲು ಉತ್ಪನ್ನಗಳಲ್ಲಿ ದೊರೆಯುತ್ತದೆ.

ತಜ್ಞರ ಪ್ರಕಾರ, ಈ ಎಲ್ಲಾ ಪೋಷಕಾಂಶಗಳನ್ನು ಸಮತೋಲನ ಆಹಾರದ ಮೂಲಕ ಪಡೆಯುವುದೇ ಅತ್ಯುತ್ತಮ. ಹೊರಗೆ ಮಾತ್ರ ಎಣ್ಣೆ ಹಚ್ಚುವುದರಿಂದ ಪ್ರಯೋಜನ ಸಿಗದು. ಪ್ರತಿದಿನ ಹಣ್ಣು, ತರಕಾರಿ, ಹಸಿರು ಎಲೆಗಳು, ಪ್ರೋಟೀನ್ ಸಮೃದ್ಧ ಆಹಾರಗಳನ್ನು ಸೇವಿಸುವುದರಿಂದ ಕೂದಲು ಆರೋಗ್ಯಕರವಾಗಿರುತ್ತದೆ.

ಇದೇ ವೇಳೆ, ಒತ್ತಡ, ನಿದ್ರಾಹೀನತೆ, ಧೂಮಪಾನ, ಮದ್ಯಪಾನ, ಅತಿಯಾದ ಜಂಕ್ ಫುಡ್ ಸೇವನೆ ಕೂಡ ಕೂದಲು ಉದುರುವ ಪ್ರಮುಖ ಕಾರಣಗಳೆಂದು ವೈದ್ಯರು ಎಚ್ಚರಿಸುತ್ತಿದ್ದಾರೆ. ಪ್ರತಿದಿನ ಕನಿಷ್ಠ 2 ರಿಂದ 3 ಲೀಟರ್ ನೀರು ಕುಡಿಯುವುದು, ನಿಯಮಿತ ವ್ಯಾಯಾಮ ಮಾಡುವುದು ಹಾಗೂ ಒತ್ತಡ ಕಡಿಮೆ ಮಾಡಿಕೊಳ್ಳುವುದು ಕೂಡ ಕೂದಲು ಆರೋಗ್ಯಕ್ಕೆ ಸಹಕಾರಿಯಾಗುತ್ತದೆ.

ತಲೆತುಂಬಾ ದಟ್ಟ ಕೂದಲು ಎಂಬುದು ಪ್ರತಿಯೊಬ್ಬರ ಕನಸು. ಆದರೆ ಅದನ್ನು ಉಳಿಸಿಕೊಳ್ಳುವುದು ನಮ್ಮ ಆಹಾರ, ಜೀವನ ಶೈಲಿ ಮತ್ತು ಆರೋಗ್ಯಕರ ಅಭ್ಯಾಸಗಳ ಮೇಲೆ ಅವಲಂಬಿತವಾಗಿದೆ ಎಂದು ತಜ್ಞರು ಸ್ಪಷ್ಟಪಡಿಸುತ್ತಾರೆ.

---