ಗಂಡನ ಜೊತೆ ಜಗಳ, ಗಂಗಾ ನದಿಗೆ ಹಾರಿದ ಮಹಿಳೆ; ಮೊಸಳೆ ನೋಡಿ ಜೀವ ಉಳಿಸಿಕೊಂಡ ಕಥೆ

ತನ್ನ ಗಂಡನ ಜೊತೆ ಜಗಳ ಮಾಡಿಕೊಂಡ ಕೋಪದಲ್ಲಿ ಮಹಿಳೆಯೊಬ್ಬರು ಜೀವನವನ್ನೇ ಮುಗಿಸಿಕೊಳ್ಳಲು ಗಂಗಾ ನದಿಗೆ ಹಾರಿದ್ದಾರೆ.

ಉತ್ತರ ಪ್ರದೇಶದ 09/09/2025:ಕಾನ್ಪುರದಲ್ಲಿ ನಡೆದ ಒಂದು ವಿಶಿಷ್ಟ ಘಟನೆ ಈಗ ಎಲ್ಲೆಡೆ ವೈರಲ್ ಆಗಿದೆ. ತನ್ನ ಗಂಡನ ಜೊತೆ ಜಗಳ ಮಾಡಿಕೊಂಡ ಕೋಪದಲ್ಲಿ ಮಹಿಳೆಯೊಬ್ಬರು ಜೀವನವನ್ನೇ ಮುಗಿಸಿಕೊಳ್ಳಲು ಗಂಗಾ ನದಿಗೆ ಹಾರಿದ್ದಾರೆ. ಆದರೆ, ವಿಧಿಯ ಆಟವೇ ಬೇರೆಯಿತ್ತು. ನೀರಿಗೆ ಹಾರಿದ ಕೂಡಲೇ ಒಂದು ಮೊಸಳೆ ಅವರತ್ತ ಬರುತ್ತಿರುವುದನ್ನು ನೋಡಿ ಜೀವಭಯದಿಂದ ಹತ್ತಿರದಲ್ಲಿದ್ದ ಮರವೇರಿ ಕೂತಿದ್ದಾರೆ. ಇದರಿಂದಾಗಿ ಮಹಿಳೆಯ ಪ್ರಾಣ ಉಳಿದಿದೆ. ಈ ಘಟನೆ ಮಾನಸಿಕ ಒತ್ತಡದಲ್ಲಿ ತೆಗೆದುಕೊಳ್ಳುವ ತಪ್ಪು ನಿರ್ಧಾರಗಳ ಅಪಾಯವನ್ನು ಮತ್ತೊಮ್ಮೆ ನೆನಪಿಸಿದೆ.

ಕಾನ್ಪುರ ಜಿಲ್ಲೆಯ ಬಿಥೂರ್ ಪ್ರದೇಶದಲ್ಲಿ ವಾಸವಾಗಿದ್ದ ಮಹಿಳೆ, ತನ್ನ ಗಂಡನ ಜೊತೆ ಜಗಳವಾಡಿದ ನಂತರ ಮಾನಸಿಕವಾಗಿ ತೀವ್ರ ಆಘಾತಕ್ಕೊಳಗಾಗಿದ್ದಾರೆ. ಕೋಪ ಮತ್ತು ಹತಾಶೆಯಲ್ಲಿ, ಅವರು ಜೀವನವನ್ನು ಅಂತ್ಯಗೊಳಿಸುವ ಉದ್ದೇಶದಿಂದ ನದಿಗೆ ಹಾರಲು ನಿರ್ಧರಿಸಿದ್ದಾರೆ. ನದಿಯತ್ತ ಬಂದವರು ಯಾರಿಗೂ ತಿಳಿಯದಂತೆ ಸೇತುವೆ ಮೇಲಿಂದ ನೀರಿಗೆ ಹಾರಿದ್ದಾರೆ. ಆದರೆ, ನೀರಿಗೆ ಬೀಳುತ್ತಿದ್ದಂತೆಯೇ, ಭಯಾನಕ ಮೊಸಳೆಯೊಂದು ತಮ್ಮತ್ತ ಸಾಗುತ್ತಿರುವುದನ್ನು ಗಮನಿಸಿದ್ದಾರೆ. ಆ ಕ್ಷಣದ ಜೀವಭಯ ಅವರಿಗೆ ಆತ್ಮಹತ್ಯೆ ನಿರ್ಧಾರಕ್ಕಿಂತಲೂ ದೊಡ್ಡದಾಗಿ ಕಂಡಿದೆ.

ತನ್ನನ್ನು ರಕ್ಷಿಸಿಕೊಳ್ಳಲು ಮಹಿಳೆ ತಕ್ಷಣವೇ ಈಜಿಕೊಂಡು ನದಿಯ ಮಧ್ಯದಲ್ಲಿರುವ ಒಂದು ಸಣ್ಣ ದಿಬ್ಬಕ್ಕೆ ತೆರಳಿದ್ದಾರೆ. ಆ ದಿಬ್ಬದ ಮೇಲಿದ್ದ ಮರ ಏರಿ ಕುಳಿತುಕೊಂಡಿದ್ದಾರೆ. ನದಿಯಲ್ಲಿ ಮಹಿಳೆಯೊಬ್ಬರು ಮರ ಏರಿ ಕೂತಿರುವುದನ್ನು ಗಮನಿಸಿದ ಸ್ಥಳೀಯರು ತಕ್ಷಣ ಪೊಲೀಸರಿಗೆ ಮತ್ತು ಅಗ್ನಿಶಾಮಕ ದಳಕ್ಕೆ ಮಾಹಿತಿ ನೀಡಿದ್ದಾರೆ. ರಕ್ಷಣಾ ತಂಡ ಸ್ಥಳಕ್ಕೆ ಬಂದಾಗ, ಮಹಿಳೆ ಗಂಗಾ ನದಿಯ ಅಪಾಯಕಾರಿ ಪ್ರದೇಶದಲ್ಲಿ ಕುಳಿತಿದ್ದರು. ಮೊಸಳೆಯಿಂದ ತಪ್ಪಿಸಿಕೊಳ್ಳಲು ಮರವೇರಿದರೂ, ಅಸಹಾಯಕ ಸ್ಥಿತಿಯಲ್ಲಿ ಜೀವ ರಕ್ಷಣೆಗಾಗಿ ಕಾತರಿಸುತ್ತಿದ್ದರು.

ಅಗ್ನಿಶಾಮಕ ದಳದ ಸಿಬ್ಬಂದಿ ಬೋಟ್ ಮೂಲಕ ಮಹಿಳೆ ಇರುವ ಜಾಗಕ್ಕೆ ತೆರಳಿ ಅವರನ್ನು ಸುರಕ್ಷಿತವಾಗಿ ರಕ್ಷಿಸಿದ್ದಾರೆ. ರಕ್ಷಣೆಯಾದ ನಂತರ ಮಹಿಳೆ ತನ್ನ ಪರಿಸ್ಥಿತಿ ಮತ್ತು ನದಿಗೆ ಹಾರಿದ ಕಾರಣವನ್ನು ವಿವರಿಸಿದ್ದಾರೆ. ಈ ಘಟನೆ ಮಹಿಳೆಯ ಕುಟುಂಬಕ್ಕೂ ಒಂದು ಪಾಠ ಕಲಿಸಿದ್ದು, ಮಾನಸಿಕ ಆರೋಗ್ಯದ ಬಗ್ಗೆ ಮತ್ತು ಕಷ್ಟದ ಸಮಯದಲ್ಲಿ ತೆಗೆದುಕೊಳ್ಳುವ ತಪ್ಪು ನಿರ್ಧಾರಗಳ ಬಗ್ಗೆ ಎಚ್ಚರಿಕೆ ನೀಡಿದೆ. ಅನೇಕ ಬಾರಿ ಸಾವಿನ ದಾರಿಯಲ್ಲಿ ಹೋದಾಗ ಮಾತ್ರ ಜೀವನದ ಬೆಲೆ ತಿಳಿಯುತ್ತದೆ. ಈ ಬಾರಿ ಮೊಸಳೆ ಒಂದು ಜೀವವನ್ನು ಭಕ್ಷಿಸದೆ ರಕ್ಷಕನ ಪಾತ್ರ ನಿರ್ವಹಿಸಿದ್ದು ನಿಜಕ್ಕೂ ಅದ್ಭುತವಾಗಿದೆ.